News Detail

Posted on 2024-08-28 03:03:59

Ikipe ya Cercle Sportif de Karongi yo mu Karere ka Karongi mu Ntara y’Iburengerazuba bw’u Rwanda, ryegukanye irushanwa rya National Summer Swimming Competition ryakiniwe kuri Pisine ya Lapalisse Hotel mu Karere ka Bugesera.

Mu koga intera ingana na Metro 400, Cercle Sportif de Karongi yakurikiwe n’ikipe

ya Vision Jeunesse Nouvelle mu gihe umwanya wa Gatatu wegukanywe n’ikipe ya Les

Daulphins. Iyi kipe kandi yanegukanye intera ya Metero 200, ikurikirwa n’iya

Les Daulphins mu gihe umwanya wa Gatatu wegukanywe n’ikipe ya Vision Jeunesse

Nouvelle.

Abakinnyi basaga 80 bitabiriye iri Rushanwa, barushanyijwe mu byiciro bitandukanye,

birimo ikiciro cy’abari hagati y’imyaka 10-12, 13-14, 15-16 ndetse nikiciro

cy’abakuru guhera ku myaka 17 kuzamura. Ibi byiciro byombi byari bigizwe

n’abagore n’abagabo.

Boze Inyogo zitandukanye zirimo; Freestyle, Backstroke, Breaststroke, Butterfly ndetse

na Relay yakinwe n’amakipe. Muri ibi byiciro by’imyaka itandukanye,

barushanyijwe muri Metero 50, Metero 100, Metero 200 na Metero 400.

Abakinnyi barimo; Nyirabyenda Neema, Byiringiro Christian na Bukombe Christian b’Ikipe ya

Cercle Sportif de Karongi, ni bamwe mu bayifashije kwegukana iri rushanwa nyuma

yo gukusanya Imidali mu byiciro bitandukanye.

Ku ruhande rw’Ikipe ya Vision Jeunesse Nouvelle, abakinnyi barimo; Niyibizi

Cedric, Alleluya Emmanuel na Uwimana Emmanuel, ni bamwe mu bakusanyije Imidali

myinshi.

Mu Kiganiro yahaye Itangazamakuru nyuma y’iri rushanwa, Umuyobozi w’Akarere ka

Bugesera, Mutabazi Richard yagize ati:“Ndashimira abakinnyi bitabiriye iri

rushanwa, kuko bafasha Igihugu kubona impano zizagiserukira mu marushanwa

atandukanye yaba ay’imbere mu gihugu no ku rwego Mpuzamahanga. Abakiri bato

ndabakangurira ko bashishikarira kwitabira Umukino wo Koga kuko urimo amahirwe

menshi”. 

Mutabazi Richard uyobora akerere ka Bugesera, yari umushyitsi mukuru muri iki gikorwa ndetse akaba yishimiye ko akarere ke kakiriye iyi mikino 

Yakomeje agira ati“ Twagiranye ibiganiro n’Umuyobozi w’Ishyirahamwe ry’umukino wo Koga

mu Rwanda, mu rwego rwo kurebera hamwe uburyo Akarere ka Bugesera kagira ikipe

y’umukino wo Koga kandi byatanze umusaruro. Hari kandi gukomeza imikoranire mu

buryo butandukanye, ku buryo n’igihe ikipe itarashingwa, amarushanwa

itandukanye y’umukino wo Koga yazajya akinirwa mu Karere kacu, natwe

nk’ubuyobozi tubigizemo uruhare, aho kuba Ishyirahamwe gusa”. 

Ku ruhande rw’Ishyirahamwe ry’Umukino wo Koga, Umuyobozi waryo, Madamu

Girimbabazi Rugabira Pamela, agaruka kuri iri rushanwa yagize ati: “Turishimira

ubwitabire bw’abakinnyi, cyane ko iri rushanwa ryakinwe abana bari mu biruhuko.

Twabonyemo impano nshya kandi ibi bitwereka ko ari ikimenyetso simusiga ko umukino wo Koga uri kuzamuka ku rwego rwiza. Uretse kurushanwa, abaryitabiriye

twabageneye ibikoresho bitandukanye, bizabafasha gukomeza gukarishya imyitozo,

cyane ko mbere y’uko basoza ibiruhuko nabwo bazakora irindi rushanwa hagamijwe

kureba ko urwego rwabo rwazamutse kurushaho.”

Nyuma

yo gufasha ikipe ya Cercle Sportif de Karongi kwegukana iri rushanwa, aganira

n’Itangazamakuru, Nyirabyenda Neema yagize ati:“Ndishimira ko ikipe yacu yahize

izindi uyu munsi. Kuba uwa mbere ntabwo ari ibintu biba byoroshye ariko

twakoze iyo bwabaga kugeza tubigezeho. Ibikoresho twahawe bigiye kurushaho

kudufasha kwitegura andi marushanwa ari imbere kandi intego ni uguhora turi aba

mbere nk’uko twabyiyemeje.”

Uretse abayobozi b’amakipe atandukanye, iri rushanwa ryitabiriwe n’Umuyobozi muri

Minisiteri ya Siporo ushinzwe Siporo n’Iterambere, Rwego Ngarambe, Umuyobozi

w’Akarere ka Bugesera, Mutabazi Richard n’Umuyobozi w’Ishyirahamwe ry’Umukino

wo Koga mu Rwanda, Madamu Rugabira Girimbabazi Pamela.